ថ្មីៗនេះមានសំណួរជាច្រើនលើកឡើងអំពីការបិទប្រូហ្វាល់ហ្វេសប៊ុក (Lock Facebook Profile) ដូចជា ហេតុអ្វីបានជា Lock Profile មិនឱ្យគេមើលឃើញផង ខណៈខ្លួនឯងដែលដាក់ Lock Profile មានលទ្ធភាពមើលឃើញគេដែលដាក់ជាសាធារណៈបាន។
ចំណែកអ្នកខ្លះទៀតបានលើកឡើងថា ប្រហែលជាអ្នកដាក់ Lock Profile នោះជំពាក់លុយគេ ឬជាប់ពិរុទ្ធ ឬក៏លួចលាក់មានស្នេហាជាមួយប្ដី/ប្រពន្ធគេហើយមើលទៅ បានជាមិនចង់ឱ្យគេដឹង ជាដើម។ លើសពីនេះទៀត ក៏មានអ្នកព្រមានថាបើដាក់ Lock Profile កុំចុច Add friend ទៅគេ គឺគេមិនទទួលឡើយ។
តើមុខងារ Lock Profile ជាអ្វី?
មុខងារថ្មីនេះត្រូវបានក្រុមហ៊ុន Meta ដែលជាម្ចាស់របស់បណ្ដាញសង្គមហ្វេសប៊ុក ដាក់ឱ្យដំណើរការនៅពេលថ្មីៗនេះដែរទេ ហើយអ្នកប្រើប្រាស់ហ្វេសប៊ុកខ្លះក៏មិនទាន់ទទួលបានមុខងារនេះប្រើនៅឡើយដែរ។ មានន័យថា គណនីខ្លះមានមុខងារនេះ ហើយគណនីខ្លះទៀតមិនទាន់មានមុខងារ Lock Profile នេះទេ។ ដូច្នេះ ប្រសិនបើអ្នករកមិនឃើញមុខងារ Lock Profile នេះទេ សូមរង់ចាំរហូតទាល់តែហ្វេសប៊ុកអនុញ្ញាតឱ្យអ្នកប្រើប្រាស់វាបាន។
ក្រឡេកមកមើលថាតើអ្វីទៅជា Lock Facebook Profile? វាគឺជាមុខងារដែលនៅពេលបើកដំណើរការវា នោះរាល់ការបង្ហោះរបស់អ្នក (រួមមាន រូបភាព វីដេអូ សារជាអក្សរ និងការស៊ែរផ្សេងៗ) នៅលើប្រូហ្វាល់របស់អ្នកត្រូវបានកំហិតមិនឱ្យឃើញជាសាធារណៈឡើយ គឺមានតែមិត្តភ័ក្តិក្នុងបញ្ជីមិត្តភ័ក្តិរបស់អ្នកប៉ុណ្ណោះដែលអាចមើលឃើញ។
ទោះយ៉ាងណា យើងដឹងហើយថាហ្វេសប៊ុកត្រូវបានបង្កើតឡើងជាបណ្ដាញទំនាក់ទំនងសង្គមក្នុងគោលបំណងឱ្យមនុស្សជុំវិញពិភពលោកមានទំនាក់ទំនងគ្នាជានិច្ចតាមរយៈអនឡាញដោយប្រើប្រាស់បណ្ដាញអ៊ីនធឺណិតដោយមិនចាំបាច់ជួបគ្នាដោយផ្ទាល់។ ទន្ទឹមនឹងនេះ វាក៏បង្កើតនូវហានិភ័យជាច្រើនផងដែរដល់អ្នកប្រើប្រាស់ ដូចជា ការគំរាមកំហែងនៃការបែកធ្លាយទិន្នន័យ ការលួចនូវអត្តសញ្ញាណ និងការប្រើប្រាស់ព័ត៌មានផ្ទាល់ខ្លួនដោយមិនត្រឹមត្រូវ ជាដើម។
ហានិភ័យនៃការដាក់ប្រូហ្វាល់ជាសាធារណៈ
- គណនីចម្លែកៗដែលអ្នកមិនស្គាល់ (ពួកគេអាចជាមនុស្សខិលខូច) អាចតាមដាននូវសកម្មភាពប្រចាំថ្ងៃរបស់អ្នក ហើយឈានដល់ការប្រព្រឹត្តបទល្មើសអ្វីមួយ ដូចជាទៅលួចទ្រព្យសម្បត្តិរបស់អ្នក ជាដើម។
- ហេគឃ័រ (Hackers) អាចប្រមូលនូវព័ត៌មានផ្ទាល់ខ្លួនរបស់អ្នក ដើម្បីរៀបចំសេណារីយ៉ូដើម្បីវាយប្រហារដោយបន្លំ (phishing attack) លើអ្នកបាន។
- ជនខិលខូចអាចប្រមូលនូវព័ត៌មានសំខាន់ៗអំពីអ្នក ដូចជា ឈ្មោះ អាយុ ភេទ រូបថត។ល។ ដើម្បីបង្កើតជាគណនីក្លែងក្លាយថ្មីមួយនៅលើហ្វេសប៊ុក ឬក៏នៅលើបណ្ដាញសង្គមផ្សេងទៀត ដោយបន្លំធ្វើជាអ្នក ហើយប្រព្រឹត្តនូវបទល្មើសណាមួយដោយអ្នកមិនដឹងខ្លួន។ ឧទាហរណ៍ ពួកជនខិលខូចទាំងនោះអាចយករូបថតរបស់អ្នកទៅបង្កើតហ្វេសប៊ុក ឬផេក ហើយទៅខម្មិន ឬស៊ែរមាតិកាណាមួយដើម្បីផលប្រយោជន៍ផ្ទាល់ខ្លួនរបស់ពួកគេ ឬក៏យកទៅបោកបញ្ឆោតមិត្តភ័ក្តិ/បងប្អូនរបស់អ្នក ដើម្បីយកមាសប្រាក់ ឬទិន្នន័យផ្ទាល់ខ្លួនរបស់ពួកគាត់បន្តទៀតផងដែរ។
- អ្នកកំពុងតែបើកចំហខ្លួនអ្នកផ្ទាល់ឱ្យក្រុមជនខិលខូចលួចនូវអត្តសញ្ញាណរបស់អ្នក។ អ្នកប្រហែលជាធ្លាប់ឮធ្លាប់អានព័ត៌មានជាច្រើនទាក់ទងនឹងការលួចយកគណនី ឬបោកបញ្ឆោតយកលុយកាក់ដែរផងក៏មិនដឹង។
អត្ថប្រយោជន៍ពីការដាក់កំហិតលើប្រូហ្វាល់ ឬ Lock Profile
- ការកំហិតនូវព័ត៌មានរបស់អ្នកលើបណ្ដាញសង្គម វាជួយឱ្យអ្នកអាចកាត់បន្ថយនូវហានិភ័យ ឬគ្រោះថ្នាក់់ជាយថាហេតុដែលអាចកើតមានឡើងរៀងរាល់វិនាទី។
- ធ្វើដូចនេះ វាជួយកាត់បន្ថយមិនឱ្យជនចម្លែកដែលអ្នកមិនស្គាល់ មកវាយប្រហារលើអ្នកដោយពាក្យអសុរោះ ឬមាក់ងាយលើអ្នក ឬដោយប្រើពាក្យសម្អប់ជាដើម។
- អ្នកបានការពារខ្លួនអ្នកពីការវាយប្រហារតាមអនឡាញផ្សេងៗ ដូចជាការលួចបន្លំអត្តសញ្ញាណ ការចាញ់បោកគេ ឬក៏មិនឱ្យអ្នកបាត់បង់នូវគណនី ឬប្រាក់កាស។
សរុបមក អ្នកដែលបានដាក់ Lock Profile គឺជាមនុស្សជោគជ័យដោយមិនដឹងខ្លួន ដែលពួកគេបានគិតគូរពីសុវត្ថិភាព និងឯកជនភាពលើអនឡាញជាចម្បង ជាពិសេស មិនត្រឹមតែបានគិតគូរអំពីខ្លួនអ្នកទេ ថែមទាំងបានជួយដល់មិត្តភក្តិ/បងប្អូនក្រុមគ្រួសាររបស់ពួកគេដោយមិនដឹងខ្លួនទៀតផង។
នេះជាតំណភ្ជាប់ក្នុងការបើកមុខងារ Lock Facebook Profile… ។ សូមប្រើប្រាស់បណ្ដាញសង្គមដោយការទទួលខុសត្រូវ និងឈ្លាសវៃ៕
 នៅលើប្រូហ្វាល់របស់អ្នកត្រូវបានកំហិតមិនឱ្យឃើញជាសាធារណៈឡើយ គឺមានតែមិត្តភ័ក្តិក្នុងបញ្ជីមិត្តភ័ក្តិរបស់អ្នកប៉ុណ្ណោះដែលអាចមើលឃើញ។){kind=link}