ក្រុមហ៊ុនបណ្ដាញទំនាក់ទំនងសង្គមហ្វេសប៊ុក (Facebook Inc.) ប្រកាសកាលពីថ្ងៃសុក្រ ទី១២ ខែតុលា ឆ្នាំ២០១៨ ថា មានគណនី ៣០លានគណនីរងការវាយប្រហារ និងត្រូវ Hackers លួចយកទិន្នន័យ។
ការអះអាងរបស់ក្រុមហ៊ុនហ្វេសប៊ុកនេះ បន្ទាប់ពីសហការស្រាវជ្រាវជាមួយក្រុមស៊ើបអង្កេត FBI របស់សហរដ្ឋអាមេរិក រយៈពេលប្រមាណ ២សប្ដាហ៍ ក្រោយពីក្រុមហ៊ុនរកឃើញថា គណនីប្រមាណ ៥០លានគណនីរងការវាយប្រហារពីសំណាក់ Hackers កាលពីថ្ងៃទី២៨ ខែកញ្ញា ឆ្នាំ២០១៨។
ក្នុងសេចក្ដីប្រកាសព័ត៌មានរបស់ក្រុមហ៊ុនហ្វេសប៊ុក នៅថ្ងៃទី១២ តុលា ឲ្យដឹងទៀតថា មានគណនី ១៤លានគណនីត្រូវបាន Hackers លួចយកទិន្នន័យអំពីទីកន្លែងដែលអ្នកប្រើប្រាស់ធ្លាប់ Check in ១០កន្លែងចុងក្រោយ ទីក្រុងដែលពួកគេកំពុងរស់នៅ និងលទ្ធផលនៃការស្វែងរកញឹកញាប់ ១៥ចុងក្រោយ។ គណនី ១៥លានគណនីផ្សេងទៀត Hackers លួចយកតែឈ្មោះ និងព័ត៌មានទំនាក់ទំនង។ ចំណែកឯអ្នករងគ្រោះប្រមាណ ១លានគណនីទៀត ក្រុម Hackers មិនបានលួចយកទិន្នន័យអ្វីនោះទេ។
អានអត្ថបទផ្សេងទៀត៖
- Facebook ប្រាប់អំពីទិន្នន័យដែលត្រូវបានលួចកាលពី ២សប្ដាហ៍មុន
- Facebook អាចនឹងត្រូវពិន័យ ១,៦៣ពាន់លានដុល្លាររឿងគណនី ៥០លានគណនីត្រូវបាន Hacked
- ៥០លានគណនីហ្វេសប៊ុក ត្រូវបាន hacked
តើធ្វើយ៉ាងម៉េចទើបដឹងថាអ្នកជាជនរងគ្រោះក្នុងការវាយប្រហារនោះ?
ជំហានទី១៖ ដំបូង Log in ចូលក្នុងគណនីហ្វេសប៊ុករបស់លោកអ្នក
ជំហានទី២៖ ចូលទៅកាន់តំណភ្ជាប់នៃ Facebook Help Center នេះ https://www.facebook.com/help/securitynotice?ref=sec
ជំហានទី៣៖ ទាញចុះក្រោមរកមើលឃ្លា «Is my Facebook account impacted by this security issue?» នៅត្រង់ចំណុចនេះ អ្នកនឹងឃើញមានចម្លើយ «Yes» ឬ «No» ដែលបញ្ជាក់ពីស្ថានភាពគណនីហ្វេសប៊ុករបស់អ្នក។
ប្រសិនបើអ្នកឃើញសារដូចខាងក្រោមនេះ នោះបញ្ជាក់ថាគណនីរបស់អ្នករងគ្រោះដោយការវាយប្រហារក្នុងចំណោមគណនីទាំង ៣០លានគណនី។
តើអ្នកស្ថិតក្នុងចំណោមអ្នករងគ្រោះផ្នែកណាមួយ ប្រសិនបើអ្នកទទួលបានចម្លើយ Yes ?
- អ្នកអាចស្ថិតក្នុងចំណោម ១៥លានគណនីដែល Hackers លួចយក ឈ្មោះ (name) អ៊ីមែល (email) និង/ឬ លេខទូរស័ព្ទ (Phone Number)
- អ្នកអាចស្ថិតក្នុងចំណោម ១៤លានគណនីដែល Hackers លួចយកទិន្នន័យខាងលើ និងទិន្នន័យផ្ទាល់ខ្លួនជាច្រើនទៀតរួមមាន ឈ្មោះគណនី (username) ភេទ ទីកន្លែង/ភាសា ស្ថានភាពទំនាក់ទំនង (relationship status) សាសនា ទីកន្លែងកំណើត ទីលំនៅបច្ចុប្បន្ន ថ្ងៃខែឆ្នាំកំណើត ឧបករណ៍ដែលធ្លាប់ប្រើជាមួយហ្វេសប៊ុក ការអប់រំ ទីកន្លែងធ្វើការ ទីកន្លែង ១០ចុងក្រោយដែលបាន checked in ឬ tagged in វែបសាយ (website) មនុស្ស/page ដែលអ្នក follow និងការស្វែងរកញឹកញាប់ ១៥ចុងក្រោយ។
- អ្នកអាចស្ថិតក្នុងចំណោម ១លានគណនីដែលត្រូវបានលួចយក Access Token (សោឌីជីថល) ប៉ុន្តែគណនីរបស់អ្នកមិនត្រូវបាន Hackers ចូលមើលនោះទេ។
តើអ្នកគួរធ្វើអ្វីខ្លះ បើសិនជាគណនីរបស់អ្នកត្រូវបាន hacked ក្នុងករណីខាងលើនេះ?
- មិនចាំបាច់ប្ដូរពាក្យសម្ងាត់ ឬព័ត៌មានអំពី credit card នោះទេ ពីព្រោះពុំមានភស្តុតាងបញ្ជាក់ថាទិន្នន័យនេះត្រូវបានគេលួចយកនោះទេ
- ប្រុងប្រយ័ត្នចំពោះ spam ឬ scam calls សារអ៊ីមែល (emails/messages) ពីព្រោះថាទិន្នន័យទាំងនេះអាចនឹងត្រូវលក់ទៅឲ្យអ្នកផ្សេង
- ប្រុងប្រយ័ត្នចំពោះសារអ៊ីមែលដែលព្យាយាមឲ្យអ្នក sign in ដោយប្រើប្រាស់ទំព័រក្លែងក្លាយដើម្បីលួចយកទិន្នន័យរបស់អ្នក
- គិតមុននឹងចែករំលែកអ្វីៗនៅលើហ្វេសប៊ុក។
ទោះយ៉ាងណា ក្រុមហ៊ុនហ្វេសប៊ុកបញ្ជាក់ថា ក្រុមហ៊ុននឹងផ្ញើសារទៅកាន់អ្នករងគ្រោះទាំង ៣០លានគណនីនៅប៉ុន្មានថ្ងៃខាងមុខនេះ ដើម្បីពន្យល់លម្អិតអំពីទិន្នន័យដែលក្រុម Hackers បានលួច និងប្រាប់ពីគន្លឹះការពារខ្លួនផងដែរ។
សូមចែករំលែកដំណឹងនេះទៅកាន់មិត្តភ័ក្ដិរបស់លោកអ្នកឲ្យបានដឹងអំពីព័ត៌មាននេះផង។ សូមអរគុណ..!
កំណត់ចំណាំ៖ ហាមយកអត្ថបទពីគេហទំព័រ www.techkhmer.net ទៅចុះផ្សាយដោយគ្មានការអនុញ្ញាត៕
 ប្រកាសកាលពីថ្ងៃសុក្រ ទី១២ ខែតុលា ឆ្នាំ២០១៨ ថា មានគណនី ៣០លានគណនីរងការវាយប្រហារ និងត្រូវ Hackers លួចយកទិន្នន័យ។){kind=link}